Літаратурная гасцёўня з цыклу “Паэты Ваўкавышчыны"

31 сакавіка ў каледжы прайшла чарговая літаратурная гасцёўня з цыклу  “Паэты Ваўкавышчыны”. Выкладчык беларускай мовы і літаратуры Ленец Алена Леанідаўна, ініцыятар і вядучая гасцёўні, запрасіла кіраўніка ваўкавыскага літаратурнага аб’яднання “Муза”, паэтэсу  Настассю Токараву-Самушчык.  З вялікім захапленнем нашы навучэнцы сустракалі маладую, прыгожую, таленавітую жанчыну, якая з першага погляду ўсім спадабалася.  

Гледачамі і слухачамі  мерапрыемства былі навучэнцы першага і другога курсаў (З-11, З-12, В-11, У-11, Э-21 групы),  выкладчыкі і намеснік дырэктара па выхаваўчай рабоце Б.І. Жардзецкая. 

Увазе аудыторыі Настасся падрыхтавала аўтабіяграфічную прэзентацыю, дзякуючы якой усе змаглі здзейсніць вандроўку па самых патаемных  кутках жыцця паэтэсы, пачынаючы з дзяцінства і да нашых дзён.

Асаблівае ўражанне выклікалі вершы, прысвечаныя матулі. Слухаючы такія шчырыя і пяшчотныя словы, хочацца самому напісаць верш, бо сэрца перапаўняецца любоўю. А гэта самое галоўнае пачуццё ў жыцці, якое дае крылы і натхняе на творчы ўзлёт.

На сустрэчы прагучала шмат розных  вершаў, але самае галоўнае, усе прысутныя  мелі магчымасць пачуць іх з вуснаў аўтара.

Прыемна ўразілі ўспаміны Настассі аб яе творчай настаўніцы Тамары Мазур, якая таксама з’яўляецца нашай зямлячкай, але, на жаль, зараз жыве ў горадзе Гродна. Зразумела, нельга было не ўспомніць яе вершы, якія выдатна прачыталі навучэнкі групы У-11 (Жуйкова А, Заблоцкая К, Ігнатчык А, Чарняк І, Шаршуновіч К, Пачакута К.).

Прыемна, што сучасная моладзь усё ж такі цікавіцца сапраўднай паэзіяй. Хто ведае, а можа каго і натхніла гэта сустрэча і хутка з’явіцца новая зорка на нашым паэтычным небасхіле…